ఖైరతాబాద్ గణేష్ నిమజ్జనం విజయవంతం

ఖైరతాబాద్ గణేష్ నిమజ్జనం విజయవంతం

మన ఇందూర్/ హైదరాబాద్:

11 రోజులు పూజలు అందుకున్న హైదరాబాద్ లోని ఖైరతాబాద్ బడా గణపతి శుక్రవారం ట్యాంక్ బండ్ వద్ద ఏర్పాటు చేసిన బారీ క్రేన్ సహాయంతో గంగమ్మ ఒడికి చేరింది. అధికారులు ముందస్తు ఏర్పాట్లు చేయడంతో ఎలాంటి ఇబ్బందులు లేకుండా నిమజ్జనం పూర్తయింది. ఖైరతాబాద్ గణేష్ నిమజ్జనం ప్రశాంతంగా ముగిసింది. మహాగణేష్ నిమజ్జనం చూసేందుకు రాష్టం నలుమూల నుంచి భక్తులు
భారీగా తరలి వచ్చారు.

69 అడుగుల ఎత్తుతో 'పంచముఖ సంకటహర మహాగణపతి'
హైదరాబాద్‌లోని అత్యంత ప్రతిష్ఠాత్మకమైన ఖైరతాబాద్ మహాగణపతి నిమజ్జన వేడుకలు శుక్రవారం ప్రశాంతంగా ముగిశాయి. ఈ ఏడాది 69 అడుగుల ఎత్తుతో 'పంచముఖ సంకటహర మహాగణపతి'గా భక్తులకు దర్శనమిచ్చిన స్వామివారి విగ్రహాన్ని వేలాది మంది భక్తుల జయజయధ్వానాల మధ్య హుస్సేన్‌సాగర్‌లో నిమజ్జనం చేశారు.

ఉదయం 9.30 గంటలకు ఖైరతాబాద్ నుంచి మహాగణపతి శోభాయాత్ర వైభవంగా ప్రారంభమైంది. యాత్ర ప్రారంభంలో దానం నాగేందర్ గణనాథుడి ఎదుట డ్యాన్స్ చేసి అందరిలో ఉత్సాహాన్ని నింపారు. 'గణపతి బప్పా మోరియా' అంటూ భక్తులు చేసిన నినాదాలతో పరిసర ప్రాంతాలన్నీ మార్మోగాయి. ఈ శోభాయాత్ర సెన్సేషన్ థియేటర్, రాజ్‌దూత్ చౌరస్తా, టెలిఫోన్ భవన్, ఇక్బాల్ మినార్, తెలంగాణ తల్లి చౌరస్తా మీదుగా ఎన్టీఆర్ మార్గ్‌కు చేరుకుంది.

ఎన్టీఆర్ మార్గ్‌లో ఏర్పాటు చేసిన క్రేన్ నంబర్ 4 వద్దకు విగ్రహాన్ని చేర్చిన అనంతరం, ఉత్సవ కమిటీ సభ్యులు ప్రత్యేక పూజలు నిర్వహించారు. మధ్యాహ్నం 2.15 గంటలకు భారీ క్రేన్ల సహాయంతో విగ్రహాన్ని సాగరంలో నిమజ్జనం చేశారు. తమ ఆరాధ్య దైవమైన గణనాథుడికి భక్తులు అశ్రునయనాలతో ఘనంగా వీడ్కోలు పలికారు. పోలీసు యంత్రాంగం పటిష్ఠ బందోబస్తు ఏర్పాటు చేయడంతో ఎలాంటి అవాంఛనీయ సంఘటనలు చోటు చేసుకోకుండా నిమజ్జన ప్రక్రియ విజయవంతంగా పూర్తయింది.

#ఖైరతాబాద్ గణేశుని నిమజ్జనం.

#69 అడుగుల బడా గణేష్ నిమజ్జనం.